ਸੱਜਣ ਕੁਮਾਰ ਤੋਂ ਪਹਿਲਾਂ ਹੀ ਸੁਪਰੀਮ ਕੋਰਟ ਪਹੁੰਚੇ ਪੀੜਤ

ਨਵੀਂ ਦਿੱਲੀ – 1984 ਵਿਚ ਹੋਏ ਸਿਖ ਕਤਲੇਆਮ ਦੌਰਾਨ ਦਿਲੀ ਕੈਂਟ ਦੇ ਰਾਜਨਗਰ ਇਲਾਕੇ ’ਚ ਪੰਜ ਸਿਖਾਂ ਦੇ ਕਤਲ ਮਾਮਲੇ ਦੇ ਪੀੜਤ ਪਖ ਨੇ ਸੁਪਰੀਮ ਕੋਰਟ ’ਚ ਕੇਵੀਏਟ ਦਾਇਰ ਕੀਤਾ ਹੈ। ਇਸ ਅਰਜ਼ੀ ਵਿਚ ਪੀੜਤ ਪਖ ਨੇ ਮੰਗ ਕੀਤੀ ਹੈ ਕਿ ਜੇਕਰ ਸਜਣ ਕੁਮਾਰ ਦਿਲੀ ਹਾਈਕੋਰਟ ਤੋਂ ਮਿਲੀ ਉਮਰ ਕੈਦ ਦੀ ਸਜ਼ਾ ਖ਼ਿਲਾਫ਼ ਸੁਪਰੀਮ ਕੋਰਟ ਵਿਚ ਅਰਜ਼ੀ ਦਾਇਰ ਕਰਦਾ ਹੈ ਤਾਂ ਅਦਾਲਤ ਕਿਸੇ ਨਤੀਜੇ ’ਤੇ ਪਹੁੰਚਣ ਤੋਂ ਪਹਿਲਾਂ ਉਨ੍ਹਾਂ ਦਾ ਪਖ ਜ਼ਰੂਰ ਸੁਣੇ। ਇਹ ਕੇਵੀਏਟ ਕਤਲੇਆਮ ਦੀ ਪੀੜਤ ਜਗਦੀਸ਼ ਕੌਰ ਵਲੋਂ ਦਾਇਰ ਕੀਤੀ ਗਈ ਹੈ। ਜ਼ਿਕਰਯੋਗ ਹੈ ਕਿ ਸਿਖ ਕਤਲੇਆਮ ਦੌਰਾਨ ਪੰਜ ਸਿਖਾਂ ਦੇ ਕਤਲ ਸਬੰਧੀ ਦੋਸ਼ੀ ਕਰਾਰ ਸਜਣ ਕੁਮਾਰ ਨੂੰ ਦਿਲੀ ਹਾਈਕੋਰਟ ਨੇ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ। ਹੁਣ ਸਜਣ ਕੁਮਾਰ ਨੇ ਹਾਈਕੋਰਟ ਵਿਚ ਆਤਮ ਸਮਰਪਣ ਕਰਨ ਦੀ ਅਪੀਲ ਦਾਇਰ ਕੀਤੀ ਹੋਈ ਹੈ। ਉਸ ਨੇ ਇਕ ਮਹੀਨੇ ਦਾ ਹੋਰ ਸਮਾਂ ਮੰਗਿਆ ਹੈ। ਇਸ ਮਾਮਲੇ ਸਬੰਧੀ ਕਲ੍ਹ ਸੁਣਵਾਈ ਕੀਤੀ ਜਾਏਗੀ।